Iti Ebanghelio tayo ita a domingo ket nangaramat manen ni Apotayo nga Jesus iti pangngarig maipapan iti maysa nga addaan lote nga ubasan. Kas nangngegan tayu nga padapada iti intedna kadagiti inawisna nga umay makipagtrabaho iti ubasan uray saan a padapada iti oras iti panagrugida. Ket nangngegan tayo dagiti nagreklamo nga immununa a napan nagtrabaho.

Kakabsat ipakita ni Apo Jesus iti Ebanghelio tayu iti kinamanagparabor iti Dios kadatayo ken iti panangtratona a kas agpapada. Ngem kunaen tayu siguro saan met nga agpapada ta apay a parehas iti intedna kadagiti naladaw a simrek idinto ta basbassit iti oras da a nagtrabaho. Datayo a tattao daytoy iti masansan a kagagaladtayu, nalaing tayu agreklamo, saan tayu ammo iti makontento kadagiti parabor a maaw-awat tayo. 

Ngarud iti Ebanghelio tayu ita a domingo palagipan natayu kadagiti nadiosan a kagagalad ken panursuro maipanggep iti daytoy a banag:

Umuna, iti Apo a Diostayo ket managparabor. Iti parabor iti Dios awan rukodna, apay nga agreklamo iti tao gapu ta naruam tayu iti panagrukod (agayat nga awan rukodna). Iti ayat, kinaimbag ken kinamanangngaasi iti Apo ket awan pilpilienna. Awan iti naidumduma, amin ket inawisna wennu inayabanna iti panangitrabaho iti pannakaisayangkat iti pagarian iti Dios, awan iti umun-una ken naud-udi, awan iti nalalaing wennu nakapkapsut, awan nabakbaknang wennu nakurapay, awan nabaybayag wennu nabibiit iti panagserbina, amin naayaban iti maymaysa nga awag iti mission iti pannakaiwaragawag iti naimbag a damag ken mangibiag iti pagarian ti Dios.

Maikadua, mapalagipantayu nga amin tayu ket addaan maawat a bendisyon ngem iti ti bendisyon ket nadumaduma segun kadagiti pagkasapulan: adda dagiti naparaburan iti materyal a bambanag, adda met dagiti naparaburan iti kinasalun-at, diay daduma naparaburan iti nasayaat ken managayat a pamilya. Diay daduma met naparaburanda iti adu nga agkakasayaat ken agkakaimbag a gagayem ken addu pay a klase ti parabur a saan a mabilang.

Maikatlo, mapalagipantayo a sursuren iti agyaman, agyaman iti Dios kadagiti parabor nga inpaayna kadatayu iti anyaman a banag. Kas nangegan tayu awan iti nagyaman kadagiti inayabanna nu diketdi panagreklamo iti insubadda iti amongda. Kakabsat agyaman tayo iti Dios ngarud ta isuna mismo iti umay a mangaw-awag kadatayo nga umay iti pagarianna ket ipaayna iti naparabor nga ayatna. Liklikan tayu dagiti nakainsigudan tayu nga maikaniwas nga aramid ken kapanunotan a manglapped kadatayo iti panagyaman iti Apo. ita a gundaway palagipannatayu ni profeta Isaias iti umuna a naibasa: “Birokenyo ti Apo, ket agkararagkayo kenkuana, ita ta asideg pay. Masapul nga isardeng dagiti managdakdakes ti wagas ti panagbiagda, ket baliwanda ti panagpampanunotda. Agsublida koma iti Apo a Diostayo, isu a manangngaasi ken madadaan a mamakawan. ‘Ti panunotko saan a kas iti panunotyo, ket ti aramidko saan a kas kadagiti aramidyo’ kinuna iti Apo”

Kakabsat babaen kadagitoy a palagip maamiris tayo koma a ti Apo sisasagana nga mangipaay kadagiti bendisyonna babaen iti ayat ken asina. Ngarud sursuroentayo iti umararaw kenkuana kadagiti kasapulantayo nga agpaay kadagiti pagimbagan saan laeng nga agpaay kadagiti kabukbukodan ngem maipaay iti kaaduan. Kas kinuna ngarud iti salmo responsoriotayo: “Asideg ti Apo kadagiti umawag kenkuana.” ket sapaykoma ta kasta. Amen.